Ciares movilízase pa salvar el Llar

Respuesta vecinal énte la intención del Conceyu de valtar la bolera y el salón d'actos.

La vieya demanda d'una actuación nel Llar de Ciares, edificiu abandonáu agora en propiedá del Ayuntamientu tres recibilu del Gobiernu, retómase con fuercia tres conocer les intenciones del equipu de gobiernu col inmueble proyeutáu por Miguel Díaz y Negrete na década de los 50. Un piñu de vecinos, convocaos pola plataforma Esto Ye Ciares, axuntáronse la mañana del sábadu na zona –la convocatoria 'Salvemos el Hogar' taba prevista énte la puerta, pero se treslladó al campu La Cruz por mor del mal tiempu– pa sentir les intervenciones del xeógrafru Rafael Suárez-Muñiz; l'arquiteutu José Ramón Puerto, vicedecanu del Colegio Oficial de Arquitectos de Asturias; Cristina Díaz Negrete, fía de Miguel; y Roberto González Álvarez, fíu del líder vecinal José Manuel Quintanal.

Los cuatro aldericaron colos presentes y defendieron la rehabilitación del Llar pa da-y serviciu al barriu. Oficines pa coleutivos, ximnasiu, sala d'aconceyamientos o esposiciones foron dalgunos de los usos propuestos pa un inmueble'l que'l Colexu d'Arquiteutos inscribió recién nel Rexistru de la Fundación DoCoMoMo Ibérico, que defende la conservación de l'arquiteutura del Movimientu Modernu.

La respuesta de Ciares nun va quedar namái nuna charra, cola intención de poner tol enfotu pa salvar un inmueble que ta na memoria coleutiva de los vecinos de la zona. Esto ye Ciares, de creación nueva y qu'axunta a delles entidaes como l'UC Ceares, el Balonmano Gijón, el Comité Ciudadano AntiSida y les asociaciones de padres de los colexos del barriu, va contar tamién cola collaboración de l'asociación de vecinos pa reivindicar un futuru pal Llar.