César punxo'l gol a la gran fiesta del fútbol xixonés n'El Molinón

L'UC Ceares y el Sporting xugaron un duelu inéditu en partíu oficial nuna eliminatoria de Copa qu'axuntó a más de 7.000 persones.

Foi una folixa na grada onde l'afición ciarista punxo los cánticos y l'ambiente y el gol, el roxiblancu César, que'l martes xugó de prieto al ser el club profesional visitante nel so propiu llar. La razón, la imposibilidá del Ciares de poder usar La Cruz por decisión federativa na primer eliminatoria del tornéu del KO, el so debú nuna competición que lu crució, coses del azar, colos de Mareo.

Pablo Busto caltuvo'l sistema habitual en Lliga, con 5 atrás, y al Sporting costó-y llegar con claridá a la meta defendida por Kike. Namái un error nun córner, con César rematando cuasi ensin oposición nel primer palu nel minutu 38, desniveló'l partíu.

Un disparu desviáu de Medori enantes del descansu foi'l mayor peligru del Ciares, qu'aguantó bien na segunda parte magar el desgaste físicu. Nesti tiempu, Aitor y Gaspar chocaron la pelota nel llargueru en dos ocasiones y l'onubense llanzó una contra que Villalba y Bertín, en fuera de xuegu, nun supieron finalizar nel añadíu.

Col xiblíu del árbitru sintiéronse dalgunos otros dirixíos a David Gallego, incapaz d'enderechar el rumbu del equipu depués de los malos resultaos nes 8 xornaes últimes lligueres, y aplausos nel fondu norte al Ciares pol esfuerciu énte un rival dos categoríes superior. Mañana'l Sporting va tar nel sortéu de la segunda ronda de la Copa, que se va xugar la selmana del 15, onde previsiblemente tendrá como rival un Primera RFEF.