Carreño suma en Moscú'l so segundu títulu individual ATP

El tenista xixonés superó na final al italianu Fabio Fognini por 4-6, 6-3 y 6-2.

Pablo Carreño sigue amosando un estáu de forma escelente, sumando títulos nel so meyor añu como profesional. Tres ganar en Winston-Salem n'agostu, ayeri ganó'l so segundu ATP 250 en Moscú tres remontar el partíu a Fognini na final de la VTP Kremlin Cup.

Pa ganar en Moscú, Carreño tuvo que dexar pel camín al austriacu Jürgen Melzel, al bosniu Damir Dzumhur, al rusu Alexander Bublik y al francés Stéphane Robert, amás d'al italianu na final. Esti trunfu va permitir al asturianu algamar el puestu 32 del Mundu, la so meyor clasificación.

Próxima parada, Basel

L'oxetivu nuevu del tenista formáu nel Real Grupo de Cultura Covadonga va ser Basel, onde se disputa dende'l sábadu'l Swiss Indoors, tornéu ATP 500, esto ye, de más categoría que'l de Moscú. El so primer rival va ser el castellanu Feliciano López.

Nesti tornéu Carreño va competir tamién en dobles, modalidá na que ta consiguiendo bonos resultaos esta temporada, con trunfos en Quito (ATP 250) y Pekín (ATP 500), llegando inclusive a xugar la final d'un Grand Slam, l'US Open. En Suiza'l compañeru del xixonés va ser l'italianu Paolo Lorenzi, col que se va enfrentar en primer ronda cola pareya formada pol sudafricanu Raven Klaasen y l'estauxunidense Rajeev Ram.