Calamaro y Loquillo van tar en Metrópoli, que torna al recintu ferial

Son dos de los artistes confirmaos pal certame que va celebrase del 1 al 10 de xunetu.

Depués de dos años na plaza de toros por mor de les restricciones d'aforu pola pandemia, Metrópoli torna al so llugar d'orixe: el Recintu Ferial Luis Adaro. Ayer la organización adelantó parte de los detalles d'esta edición y los nomes de dalgunos de los grupos que van tocar nel festival, ente los que rescamplen Andrés Calamaro, que yá tocara nel 2019 nesi mesmu llugar.

Loquillo, Bizarrap y Rulo, cola so propuesta 'Noches de Fuga y Contrabando', van ser otros de los platos fuertes d'esti añu. Entovía ensin feches concretes, tamién apaecen nel cartelu son Marlon, Ptazeta, Quevedo, Delaporte, Tigre y Diamante, Taburete, Bejo, Rapsuklei, Dudi y Viuda.

Amás, Metrópoli va presentar otres munches actividaes, como la esposición 'Yo fui a la EGB' o otra dedicada a Barbie, y una Comic Con, amás de la habitual zona hostelera con actuaciones propies.