Bad Religion torna al Tsunami seis años depués

La sesta edición del Tsunami Xixón yá ta en marcha, tercera nel Parque Inglés. Esti martes la organización anunció’l cartelu definitivu, nel que rescampla la vuelta a la ciudá de los estauxunidense Bad Religion, cabeces visibles del certame xunto a los ingleses Yungblud y Royal Blood, y va sacar los abonos a la venta’l xueves.

Foi’l gran reclamu de la segunda edición, nel 2018, nel que celebraben los 30 años del ‘Suffer’, y torna a selo na del 2024. Bad Religion torna a Xixón p’allegría de los munchos siguidores de la banda de hardcore melódicu nuna edición na que tamién va tar otra banda referente del estilu, Descendents, que se cayó esti añu por un infartu leve del cantante Milo Aukerman qu’obligó a los californianos a cancelar la xira europea.

El Tsunami presenta como otros cabeces de cartelu a Yungblud, que va dar n’Asturies el so primer conciertu nel norte del Estáu, y una banda contrastada como Royal Blood. Completen el llistáu de participantes Enter Shikari, Arde Bogotá, Alkaline Trio, The Last Internationale, Biznaga, The Mysterines, Ban Nerves, Miscondunt, Amygdala, Antifan, Blowfuse, Catalina Grande Piñón Pequeño, Tiburona, Nitropollo, Tortiboys, Miniño, Rojo 2 y Ukelele Joe, anque podría haber más novedaes.

Dos xornaes y adelantu de feches

Esti 2024 la organización recupera les dos xornaes en llugar de les trés de les dos ediciones últimes, y adelanta les feches habituales del Tsunami, en concreto nuna selmana. Va desenvolvese’l 19 y 20 de xunetu nel Parque Inglés (Hermanos Castro).

Los abonos pa los dos díes van salir a la venta’l xueves a les 14 hores. Entovía nun s’anunciaron los precios de los mesmos.

Los interrogantes correspuenden a Descendents.