Atópase pataca afeutada pola poliya guatemaliana en Xixón

Va investigase si ye un casu aisláu.

Un agricultor de Montiana púnxose ayeri en contautu cola Conseyería de Desarrollu Rural y Recursos Naturales al sospechar que guardaba pataca que podría tar infestada pola plaga qu'obligó a prohibir la plantación d'esti tubérculu per un mínimu de dos años en cuatro conceyos del occidente y en delles zones d'otres trés. Los téunicos desplazaos hasta la vivienda confirmaron qu'había 67,3 quilos afectaos y procedieron a la so retirada y destrucción.

"Esti fechu reflexa la necesidá d'adoptar midíes adicionales pa lluchar contra la plaga en Xixón", apunten dende la conseyería, que va investigar la zona pa determinar si la presencia confirmada de la poliya respuende a un brote aisláu o si, por contra, ta estendida, dalgo que va entamase tamién en dellos conceyos de la mariña. "Con esti propósitu, el Principáu va ampliar la resolución del 13 de marzu na que se concretaba'l Programa Nacional de Control y Erradicación de Tecia Solanivora pa la comunidá", añaden al tiempu que soliciten a la ciudadanía qu'alerten de cualquier sospecha de presencia d'esti insectu con orixe en Centroamérica.

Na semeya: Pataca afeutada pola poliya guatemaliana (por Susi.besteirocabanas (Own work) [CC BY-SA 4.0 (http://creativecommons.org/licenses/by-sa/4.0)], via Wikimedia Commons)