Apoyu institucional al Día de la Reciella y a la tresmisión xeneracional del asturianu

El Plenu va aprobar la selmana qu’entra una declaración institucional pola que’l Conceyu de Xixón sofita la continuidá del Día de la Reciella y se compromete cola tresmisión xeneracional del asturianu. Esti domingu celébrase nel Pueblu d’Asturies esta xornada familiar al rodiu del idioma.

Tolos grupos municipales, a esceición del Partido Popular (PP), van apoyar esta declaración institucional nel Plenu d’ochobre, esto ye, la selmana qu’entra al celebrase’l segundu miércoles y xueves de cada mes. El documentu, na so esposición de motivos, fai un repás a la "llarga historia d’usu y promoción del asturianu" de Xixón.

Asina, cita a Gaspar Melchor de Xovellanos, a la so hermana Xosefa y a Juan Junquera Huergo, alcalde nel sieglu XIX “responsable de dellos fitos de les nueses lletres: la primer Gramática Asturiana y el primer Diccionariu Asturianu”. Yá nel sieglu XX, noma a la revista ‘Ixuxú’, a l’Academia Asturiana y  a Enrique García-Rendueles, y fai referencia a la primer manifestación autorizada tres la dictadura y na que se pidía, ente otres demandes, “la presencia del asturianu nes escueles”.

“Por ello, y coincidiendo cola celebración d'un nuevu Día de la Reciella, qu’algama yá la so sesta edición, esta corporación quier anovar y reforzar esi compromisu de Xixón, calteníu a lo llargo de los sieglos, manifestando que la supervivencia de cualquier llingua precisa la tresmisión na familia y que la llingua asturiana ye un legáu cultural que como toles demás llingües del mundu –y como bien espresaba Xovellanos– sólo va poder siguir siendo una llingua viva si se continúa tresmitiendo de xeneración en xeneración”, sigue’l documentu. Por último, recuerda que “si les families de Xixón caltienen y practiquen l'asturianu en familia –amás del castellanu y d'otros idiomes que van deprender tamién en casa o nel momentu del procesu de socialización– los neños y neñes van tener munches más facilidaes pa deprender llingües nueves gracies la flexibilidá intelectual qu’apurre conocer un segundu idioma”.

Alcuerdos

Dao tolo espuesto anteriormente, el Conceyu de Xixón va alcordar sofitar el Día de la Reciella “llamando a la so continuidá y a la participación nesti eventu de les families de Xixón nos años venideros”. Tamién va “anover el compromisu históricu de la ciudá y de la corporación cola tresmisión interxeneracional del asturianu, faciendo un llamamientu a la población a faer efectivu, de forma arguyosa y activa, l’usu y la tresmisión d’una llingua histórica que nos  identifica como comunidá, que foi parte del nuesu patrimoniu mientres sieglos, y que se complementa de forma non escluyente col usu del castellanu y d'otros idiomes falaos poles persones que nos visiten o que moren nel nuesu conceyu”.

Por último, pauta “favorecer, potenciar y ampliar les midíes que dende l’ámbitu institucional sían pertinentes pa que les families xixoneses que lo deseyen puedan conocer les ventayes de la tresmisión del asturianu y que tengan facilidaes pa que los sos fíos y fíes tengan opciones para socializase al traviés de la llingua asturiana”.

Esti domingu

El VI Día de la Reciella va celebrase esti domingu nel Muséu del Pueblu d'Asturies, destacando ente tola amplia programación ‘Entaína’, la carrera de relevos ente güelos, padres, fíos y nietos que simboliza la tresmisión xeneracional del idioma. La entrada ye de baldre y esti añu'l cantar que lu promociona ye '¡Espoxiga!', de Pop Piquiñín.