Alba va representar 'Llázaro de Tormes' nel Antiguu Institutu

Esta obra ganó la primer edición del Premiu y Festival Nel Amaro de Teatru Profesional en Llingua Asturiana o Gallego-asturiano.

L'adaptación teatral asturiana de la novela anónima ‘La vida de Lazarillo de Tormes y de sus fortunas y adversidades’ fecha por Carlos Alba 'Cellero' va representase'l día 21 nel patiu del Antiguu Institutu. Nella, l'actor fai de pregoneru de los vinos del Arcipreste de San Salvador, cuenta les sos 'picardíes' col envís de xustificar la so vida y fai un retratu coñón de la sociedá de la época.

La función va principiar a les 18.30 hores y l'accesu ye de baldre. Sicasí, ye necesario acutar plaza nel corréu electrónicu llinguaasturiana@xixon.es, indicando nome y apellíos de les persones asistentes y un teléfonu de contautu, primero del mesmu día de l'actividá al meudía.