Aína defende un plan d'usos pal Llar de Ciares pa la so rehabilitación

La formación asturianista sofita los plantegamientos de l'asociación vecinal Esto ye Ciares y pide meyores nel barriu.

Coincidiendo coles fiestes de Ciares por Santiagu, que se celebraron estos díes, l'Agrupación Llocal de Xixón d'Aína plantegó delles propuestes "pa meyorar la vida del vecindariu del barriu". La situación del Llar de Ciares ye ún de los principales esmolecimientos de los ciudadanos d'esta zona del conceyu y el partíu defende "el desarrollu del plan d’usos" del Llar de Ciares pa la so rehabilitación "pola importancia que supón el so calter vetebrador p’habitantes, colectivos y asociaciones deportives", como reclama Esto ye Ciares.

D'igual forma, demanda l'habilitación de "un chigre-tienda de titularidá municipal pa da-y respuesta a les carencies que’l vecindariu de La Teyerona tien nesti sen". Otra manera'l partíu asturianista esixe "que toles alministraciones s’impliquen pa que’l Colexu Públicu Los Pericones puea competir n’igualdá de condiciones colos colexos concertaos del mesmu barriu, ufriendo les mesmes opciones d’acompañamientu y conciliación".

Infrautilización de Los Pericones

Aína tamién critica "la infrautilización del parque de Los Pericones, un enorme espaciu verde nel corazón del barriu que nun tien nenguna dotación deportiva y con un equipamientu infantil avieyáu, polo qu’apuesta pol so ameyoramientu y actualización". Pa finar, reclama que s'atiendan "les reivindicaciones vecinales y que los planes d’ameyoramientu o renovación s’abran a la participación popular de los sos habitantes y trabayadores".