Actu homenaxe a Sánchez Vicente na presentación de 'Propia xera'

Esti xueves 8 de febreru, a les 19:30 hores y nel Salón d'Actos del Antiguu Institutu de Xixón, va celebrase la presentación de 'Propia xera (Poesía completa 1974-2018)' de Xuan Xosé Sánchez Vicente. 

Esta obra editada por Ediciones Saltadera ye un volume que recueye los seis llibros de poesía que lleva publicaos Sánchez Vicente, amás de dellos inéditos y traducciones de Horacio, Seamus Heaney y Ezra Pound.

Sánchez Vicente ye un poeta de múltiples rexistros na que la so obra poética foi siempre recibida como daqué secundariu frente a la proyección pública del so trabayu políticu, cuando lo cierto ye que tamos énte un poeta mayor, al que-y gusta anovar y ensayar caminos y llinguaxes nuevos.

El títulu, Propia xera, ta tomáu d'un versu del poema 'Asturies' col qu'abría'l so primer llibru de 1980, 'Camín de señardaes'. Los significaos de la palabra asturiana 'xera', que vien de la palabra llatina diaria, cuadren perbién al llabor poéticu qu'a lo llargo de casi cuarenta y cinco años desenvolvió l'autor. D'ente los de la so xeneración, ye l'únicu poeta qu'escribió poesía n'asturianu, y namás que n'asturianu, a lo llargo de la so vida entera. Xuan Xosé Sánchez Vicente cargó a los sos llombos, como 'xera propia', camudar l'aldu de la poesía asturiana y nesti tomu ufiértense el so indiscutibles llogros poéticos.

Nel actu de presentación, amás del propiu autor y d' Antón García, prologuista y editor de la obra, van tar presente Leopoldo Sánchez Torre, profesor de la Universidá d'Uviéu y espertu en poesía, y los poetes Inaciu Galán y Naomi Suárez.