¡A pol récor!

La XXVII Fiesta de la Sidra Natural encara'l so tramu final, onde s'agrupen les actividaes más importantes del certame. Ente elles destaca l'intentu de superar el récor d'escanciáu sumultaeneu de sidra, afitáu l'añu pasáu en 9.403 persones.

La cita ta prevista mañana, a les 20.30 hores, na sablera d'El Natahoyo. Tolos asistentes van recibir una botella de sidra de baldre, anque han de trayer el vasu de casa o mercar l'oficial por 1 euru, cola posibilidá tamién d'acudir con una botella si nun quier esperar a la posible filera que se forme dende que comience'l repartu de les 9.404 que pon la organización dende les 18 hores.

L'intentu del récor abre los últimos díes del Festival de la Sidra Natural, que comenzó'l sábadu cola apertura del Mercadín de la Sidra y la Mazana que s'asitia nos Xardinos de la Reina y que va permanecer hasta'l domingu a les 22 hores, cuando'l certame eche'l pieslle.

Culinos y cantares de chigre

Pa esta tarde ta prevista la celebración del XXV Concursu d'Escanciadores, puntuable pal Campeonatu d'Asturies, que va comenzar a les 17.30 hores na Plaza Mayor, ún de los eventos más esperaos. Otru son los 'Cancios de chigre', el sábadu a les 21 hores, momentu nel que'l públicu canta en comuña cola Sociedá Torner cantares tradicionales.

El domingu, día grande, va tener l'eventu central dende'l meudía. Rosabel Berrocal, organizadora del eventu nos venti años últimos, va recibir el Tónel d'Oru, y va comenzar la preba de baldre de sidra hasta les 15 hores, cuando va interpretase l'himnu del país.

Pentemedies, va fallase y entregase les condecoraciones a los llagares ganadores d'esta edición, tanto del xuráu como del públicu.