2017 foi un perbon añu pal turismu

Xixón fina 2017 colos meyores datos turísticos de la hestoria de la ciudá.

La cifra total de viaxeros agospiaos n’establecimientos hoteleros de Xixón en 2017 algama les 419.500 persones; poro, son 17.744 más que l’añu anterior y medra un +4,4%, afitando un máximu hestóricu nuevu.

Como yá se comentare davezu, Divertia realiza dellos axustes nos datos de 2014, 2015 y 2016 según el númberu de places hoteleres qu’esisten daveres na ciudá nesi periodu.

Esta tasa de crecimientu (+4,4%) supera la rexistrada pa la media de les 7 ciudades principales de la España Verde (+3,5%) y ye Xixón la segunda ciudá que más medra, namás superada por Santander. Xixón afítase asina como’l motor turísticu d'Asturies.

El crecimientu caltiénse tanto pal turismu nacional (+3,6%) como pal foriatu (+10,1%). La cifra acumulada nesta estaya de mercáu algama los 57.271 viaxeros y ye la más alta rexistrada fasta la fecha na ciudá dende que se dispón de datos oficiales. 

No que cinca al númberu de pernoutaciones hoteleras la cifra acumulada algama los 824.781; poro, aseméyase a la rexistrada en 2016 (meyor datu hestórico) y baxa sele (-0,7%). Ye un resultáu perbonu nun añu nel que medraron les pernoutaciones en pisos turísticos.

No que cinca a la rentabilidá, l’ingresu mediu por habitación ocupada (ADR) afítase en 66,83 euros de media en 2017 (un +7,0% más que l’añu caberu) ya’l RevPAR ye de 36,91 euros por habitación disponible y medra un +1,7% respeuto al añu caberu.

La fauturación del seutor hotelero en conceutu d’agospiu en 2017 asciende a 34,1 millones d’euros; poro, medra un +3,9% respeuto al añu caberu.

Encuesta Demanda DIVERTIA

Na Encuesta de Demanda ellaborada mensualmente por Divertia remanez que, en 2017, visitaron la ciudá un total de 1.585.673 viaxeros, lo que supón un +3,4% más que l’añu pasáu y afita un récor nuevu hestóricu pa la ciudá. Esto significa que 2017 foi’l meyor añu turísticu de la hestoria de la ciudá.

La cifra d’escursionistes algama les 497.279 persones, lo que supón un incrementu del +0,2 respeuto al añu pasáu, y la de turistes agospiaos na ciudá los 1.088.394 restantes, con un medru del +5,4% respeuto a 2016.

El 38,5% de los turistes agospiáronse n’establecimientos hoteleros (419.500 persones), lo que supón un incrementu del +4,4% respeuto al añu caberu, como ya se comentara enantes.

N’establecimientos estrahoteleros agospiáronse 42.371 viaxeros (+4,5%), en pisos d’alquiler 24.393 viaxeros (+5,5%) y en viviendes privaes en propiedá o d’amigos o familiares 602.130 persones, un +5,2% más que l’añu caberu.

No que cinca al númberu de pernoutaciones totales, algámase la cifra récor de 5.260.833, lo que ye un medru del +5,5% respeuto al añu pasáu y supera pela primer vegada na hestoria de la ciudá la cifra de los 5 millones de pernoutaciones.

El repartu d’esta cifra total de pernoutaciones ye 824.781 n’hoteles -segundu meyor datu hestóricu per detrás de 2016-, 138.987 n’establecimientos estrahoteleros, 88.973 en pisos d’alquiler y 4.208.125 en viviendes privaes propies o d’amigos o familiares.