Actívase'l Protocolu Anticontaminación de la Zona Oeste en nivel 1

Alcaldía tomó la decisión polos rexistros daos nes estaciones de calidá del aire d'El Lauredal y Santa Cruz no que respeuta al parámetru PM2,5.

Esti meudía activóse Protocolu Anticontaminación de la Zona Oeste en nivel 1 a partir d'un informe del Serviciu de Vixilancia y Calidá Ambiental de la Conceyalía de Mediu Ambiente y Sostenibilidá. La resolución dexa fuera de les midíes de reducción a aplicar la "prohibición de circulación de vehículos pesaos que tresporten a granel sólidos n'estáu de polvu, pela avenida Príncipe de Asturias, tou'l tiempu que dure l'activación del protocolu".

La información de la situación por parte de les alministraciones, el riegu de viales, la prohibición de quemes vexetales en suelos non urbanos o la reducción de la velocidá de 120 a 90 quilómetros per hora en carreteres de la zona onde s'activa'l protocolu son dalgunes de les aiciones que se ponen en marcha. Esta situación llega pola superación de la presencia de partícules PM10 y PM2,5 dende'l domingu llegando a 62 y 32 (El Lauredal) y 68 y 38 (Santa Cruz) cuando 40 y 20 ye la llende d'escenariu "razonablemente bonu", siendo inclusive superiores los rexistros de l'avenida Arxentina (69 y 34), anque lo que motiva l'activación son los datos del parámetru PM2,5 nes dos primeres.