Xixón paga la so deuda histórica con Xosefa Xovellanos

La cai L’Argandona va llevar el nome propiu de la persona a la que ta dedicada, Xosefa Xovellanos. Tolos conceyales del Plenu, cola única esceición de la de VOX, apoyaron la propuesta de Compromisu por Xixón pa modificar el nome d’esta vía, que, sicasí, va caltener el nomatu de la primer escritora conocida de les nueses lletres.

PSOE, Foro, PP y Podemos, amás del conceyal non adscritu, Óliver Suárez Rubio, ex de VOX, votaron a favor de la proposición, qu’incluyó una enmienda presentada pol PSOE, que precisamente tien la so sede nesta cai. Ésta solicitaba caltener L’Argandona nel nome de la cai pa torgar molesties a los vecinos de la cai pol cambiu, polo que finalmente va ser ‘cai Xosefa Xovellanos (L’Argandona)’.

La xunta de gobiernu ha ratificar agora la posición del Plenu y pasar l’asuntu al conseyu de distritu pa siguir cola tramitación d'esta modificación. D’esta forma Xixón paga la so deuda histórica cola escritora, que contaba con reconocimientu en forma de cai que nun llevaba’l so nome, sinón el nomatu que-y dieron pol apellíu del so home, Domingo González de Argandona.

La historiadora Arantza Margolles, en representación d’Iniciativa pol Asturianu, defendió la propuesta convidada por Convocatoria por Xixón enantes del alderique. Sara Concepción Álvarez Rouco, de VOX, foi la única que s’opunxo.

Bandera d’España de grandes dimensiones en L’Humedal

Nel Plenu d’esta mañana tamién se trató una proposición “sobre la colocación de una bandera de España y la ubicación de una Plaza de España” presentada por VOX, la primera que presenta no que va de llexislatura. Foro –que retiró les sos dos enmiendes que buscaben nun tener qu’instalar el mástil precisamente en L’Humedal, como quier la formación ultraderechista, y refugar la creación de la plaza–, PP y Suárez Rubio xuntaron el so votu al de VOX pa que s’aprobara.

Asina, L’Humedal va acoyer una bandera d’España de grandes dimensiones y un espaciu nuevu de la villa va agospiar una ‘plaza de España’, con preferencia pal Solarón o los terrenos de Naval Xixón que pretende adquirir el Conceyu. PSOE, Convocatoria por Xixón y Podemos opunxéronse a la propuesta apoyada pola derecha en bloque.