Recuperen la reclamación pa que la cai dedicada n'El Llano a Xosefa Xovellanos lleve'l so nome propiu

Que la cai dedicada a Xosefa Xovellanos na villa lleve’l so nome. Ésta ye la proposición que Convocatoria por Xixón va presentar nel Plenu próximu al respeuto de L’Argandona, vía n’homenaxe a la primer escritora n’asturianu a la que-y punxeron el so nomatu pol apellíu del so home, y que Xixón Sí Puede yá propunxo modificar nel 2019 algamando’l preste de Foro, pero ensin llegar a executase.

Domingo González de Argandona yera’l nome completu del so maríu, de la que saliera L’Argandona, col que se bautizaría una cai que nel 1939, col Franquismu, cambiara a Hermanos Fresno. Cuando se recuperó pa Xosefa Xovellanos nel 1990, por contra, optóse pol nomatu de Xosefa Xovellanos enantes que pol nome propiu, contribuyendo a la so invisibilización.

Xixón Sí Puede, en marzu del 2019, pidió añadir Xosefa Xovellanos a L’Argandona, recoyendo asina una demanda fecha por dellos sectores de la sociedá. Foro, nel gobiernu, aceptó’l ruegu, pero no que quedaba de llexislatura nin na siguiente, con PSOE y Asturies pela Izquierda (IX-IAS) al frente, se fixo la modificación.

Agora ye Convocatoria por Xixón (IX-Más País-IAS) la formación que va llevar al Plenu próximu una propuesta pa que la cai L’Argandona pase a llamase Xosefa de Xovellanos. Asina lo anunció esta mañana la edil Noelia Ordieres nuna comparecencia xunto cola historiadora Arantza Margolles y el periodista y académicu Inaciu Galán, d’Iniciativa pol Asturianu.

“Ye de xusticia facer esti tipu de cambios”, apuntó la conceyala, magar les molesties que puedan ocasionar a los vecinos el cambiu de nome nesta cai qu’algama el númberu 59, nos bloques impares, y el 52, nos pares. “Una de les soluciones que pue dase pue ser qu’ente paréntesis, abaxo, ponga ‘L’Argandona’”, añadió darréu.

Ordieres esplicó que’l procesu pal cambiu ye encamentar primero a la xunta de gobiernu, qu’ha llevar l’asuntu al conseyu de distritu pa siguir la tramitación. “Esto no que consiste ye que d’una vez esta cai se reconoza como la cai de quién ye. Nun podemos siguir con esta anomalía histórica”, apuntó.

“Debemos-y toes una reconocencia”

“Xixón debe-y munches coses a Xosefa Xovellanos, Asturies entera”, apuntó Margolles, qu’enantes espunxera la invisibilización que les muyeres sufrieron na historia que fixo que munchos poemes como los de la xixonesa, primera escritora que conocemos en llingua asturiana, nun salieren del caxón de la so mesina y nun llegaren a los nuesos díes. “Debemos-y toes una reconocencia pola so obra lliteraria, pola so obra solidaria, pola so obra social, pol so papel enxamás reivindicáu como cronista del so tiempu. Ye espantible que debiendo-y tantes coses como-y debemos sigamos en plenu 2024 que la cai que la homenaxa, a cencielles, lleve’l so nome propiu, non otra cosa”, siguió.

Pela so parte, enganchando coles pallabres previes de la historiadora, Galán rescampló que n’Asturies, “como en tolos sitios del nuestru mundu, la muyer vive discriminación. Pero amás cuando escribes nuna llingua minorizada vives un doble estigma que ye’l que-y pasa a Xosefa Xovellanos. Si Xosefa escribiera en castellanu de xuru yá tendría cai”.

Tamién recordó que, na lliteratura asturiana, “dende’l primer llibru yá hai una muyer presente”, en referencia a la ‘Colección de poesías en dialecto asturiano’ (1839) de José Caveda y Nava, “y tuvo a punto de nun talo, porque nel primer borrador nun apaecía, y nun sabemos mui bien por qué al final decidió incorporala, lo que ye una suerte”, pa depués calcar na importancia de da-y visibilización a Xosefa de Xovellanos y a otres munches escritores asturianes de la historia de les nueses lletres. “Pidimos a los grupos políticos qu’esta propuesta se lleve alantre y que se solucione rápidamente porque llevamos años reclamándolo y ye una cuestión de consensu que nun puede molestar a naide: qu’una cai lleve’l nome de la muyer a la que se-y dedicó”, finó.

Na semeya, l'actual cai L'Argandona, nel so entamu.