¡Yá tán equí!

Los Reis Magos yá tán en Xixón. Melchor, Gaspar y Baltasar aportaron en barcu a la villa y, llueu de percorrer parte en coche, prepárense pa la siempre esperada cabalgata que va tener salida del Colexu Públicu Montevil, finalmente ensin animales presentes, cola mirada nel cielu.

La predicción de l’Axencia Estatal de Meteoroloxía (Aemet) ye d’agua ente les 19 y 20 hores, pero la maxa qu’arrodia la xornada da esperanza a qu’aguante pa poder disfrutar de la presencia d’estos trés viaxeros d’oriente que vienen a repartir allegría y ilusión. Sobre les 10.30 hores yá se les pudo ver per El Muelle, siendo recibíos pa gran cantidá de xixoneses, la mayor parte neñes y neños, momentu nel que la lluvia nun fixo actu de presencia.

La receición oficial va tener llugar a les 13 hores na Casa Conceyu, pa depués descansar hasta les 18.30 hores, cuando ta previstu l’entamu de la yá centenaria gran cabalgata, na que ta prevista la presencia de 11 carroces, 7 vehículos d’apoyu y la participación de 1.100 persones, pero definitivamente ensin animales, como pretendía Divertia. El percorríu va ser el siguiente: El Río Eo, Carretera Carbonera, Schultz, Manuel Llaneza, Hermanos Felgueroso, San Bernardo, Los Moros, Plaza El Carme y Marqués de San Esteban hasta los Xardinos de la Reina.

El discursu na Plaza Mayor de los Reis Magos será al rodiu les 21.30 hores. Llueu Melchor, Gaspar y Baltasar encarán una llarga nueche de trabayu pa llevar regalos a les cases de la villa.