El calendariu del 2024 del Pueblu d'Asturies y la Oficina de Normalización fai un percorríu pelos 100 años de la Feria

La primer Feria de Muestras Asturiana –ésti yera’l nome qu’apaecíu nel cartelu d’entrada– celebróse en Begoña n’agostu del 1924. Esti 2024 cúmplense 100 años del eventu y el Muséu del Pueblu d’Asturies y la Oficina de Normalización Llingüística quixeron dedicar el so calendariu a esta cita internacional clave nel Xixón del sieglu XX y XXI.

En total son trece imáxenes, una per mes y la de portada, na que poder dir viendo la evolución y crecimientu de lo que güei conocemos como Feria Internacional de Muestres d’Asturies (FIDMA), que dende’l 1969 vien celebrándose nel recintu ferial actual. Agostu, como nun podía ser d’otra forma, acueye una semeya áerea, especial por ser d’esi añu, nel que poder ver la primer ordenación del mesmu y un Muséu del Pueblu d’Asturies inauguráu recién, que se pue comparar cola d'avientu, del 1975 col mesmu enfoque.

Esa semeya pertenez al fondu de FOAT, pero nel calendariu tamién apaecen fotografíes de Constantino Suárez, Laureano Vinck, Vegafer, José Manuel Nebot, José Muñiz y Luis Argüelles, asina como alguna d’autor desconocíu, toes pertenecientes al archivu del muséu. Trece semeyes espectaculares que faen a esti calendariu imprescindible.

‘De Feria per Xixón 2024’ sigue’l mesmu diseñu d’años anteriores, con un refrán n’asturianu acompañando a cada mes. Ésti repártese de baldre nes receiciones del Muséu del Pueblu d’Asturies y nel del Antiguu Institutu hasta escosar esistencies.