Foro y PP lleguen a un alcuerdu y negocien l'apoyu necesariu de VOX

El sábadu 17 ye'l Plenu de constitución del Conceyu y sigue nel aire quién va conformar gobiernu. Convocatoria por Xixón propón un movimientu p'arrequexar a la ultraderecha.

Foro y PP zarraron el martes un alcuerdu de gobiernu nel Conceyu que da l'Alcaldía a Carmen Moriyón y el cargu de vicealcaldesa, que como tal nun esiste, a Ángela Pumariega. La xunta taría formada por cinco ediles y trés de cada partíu, de manera respeutiva, formaciones que'l 28-M sumaron 8 y 5 insuficientes pa tener la mayoría absoluta necesaria, que s'afita en 14.

Por esti motivu necesita los votos de VOX pa torgar que sía la llista más votada, la del socialista Luis Manuel Flórez ‘Floro’, la que forme gobiernu. Un alcuerdu que, sicasí, nun acaba de llegar por reclamar esta formación entrar tamién nel equipu de gobiernu.

Pa evitalo, güei Javier Suárez Llana, candidatu de Convocatoria por Xixón (IX-Más País-IAS), qu'afirmó que "nun ta en disputa l'Alcaldía, sinón la entrada de la ultraderecha de VOX nel gobiernu de la ciudá", reclamó "una respuesta compartida de defensa de les instituciones democrátiques y el nuesu modelu de convivencia". "Agotemos toles víes. Los dos partíos más votaos, PSOE y Foro, han entamar un diálogu que nos sume al restu de partíos democráticos y que permita establecer un gordón sanitariu a la ultraderecha a lo llargo de tol mandatu".

López Moro volvería a Cultura

L'alcuerdu ente Foro y PP da al partíu más votáu, amás de l'Alcaldía, les conceyalíes d'Urbanismu, Facienda, Movilidá, Seguridá Ciudadana, Obres Públiques, Festexos y Cultura, onde repetiría Montserrat López Moro. Pa los populares sería Educación, Mediu Ambiente, Deportes y Distritos.

El primer gobiernu d'una coalición de derecha contaría ente les sos exes principales d'aición política la revisión fiscal, la movilidá, l'estudiu d'una solución pa El Muro cola reversión inmediata al estáu anterior a la pandemia, l'ameyoramientu de la burocracia municipal, el desendolcu de los proyeutos del Parque Científicu Teunolóxicu y Naval Xixón, la recuperación del aniellu navegable, sensibilidá hacia la zona rural o la recuperación de los toros.

Na semeya, Jaime Fernández-Paíno y Jesús Martínez Salvador, negociadores de Foro, xunto colos populares Pablo González y Rodrigo Pintuales.