La sablera San Llorienzo entra na Rede Asturiana de Playes ensin Fumu

27 arenales de 8 conceyos participen nesti programa pa prevenir el tabaquismu. La cartelería escaez l'asturianu y el topónimu Xixón.

La Playa San Llorienzo ye ún de les cinco sableres que s'incorporen esti añu a la Rede Asturiana de Playes ensin Fumu y la primera de Xixón en formar parte d'esta iniciativa de la Conseyería de Salú que "promueve una vida llibre de tabacu, previene'l consumu y fomenta'l respetu a les persones y al mediu ambiente". Les otres son les de Torbas, Monellos y Riboira, n'El Franco, y La Ñora, en Villaviciosa, na llende col conceyu.

El Conceyu recibió esta mañana'l diploma conmemorativu coincidiendo cola celebración esti miércoles, 31 de mayu, del Día Mundial ensin Tabacu. Amás instalóse una bandera y seis señales pa indicar de que La Playa San Llorienzo ta llibre de fumu, toes elles ensin presencia de la llingua asturiana y del topónimu Xixón, oficial na forma billingüe 'Gijón/Xixón'.

El fechu de pertenecer a la Rede de Playes ensin Fumu nun significa que tea prohibío fumar na principal playa urbana del conceyu, sinón que supón una recomendación pa los usuarios fundamentada na so salú y nel respetu a los demás.

Les otres 26

Amás de La Playa San Lloriezo, pertenecen a esti programa de Salú toles sableres de Castrillón y d'El Franco, y les de de Penarronda en Castropol; L'Estilleru, La Griega y La Isla, en Colunga; el Sablón, en Sotu'l Barcu; A Ribeiría y As Pantorga, en Tapia; Misiegu, Rodiles (Miami), El Puntal y La Ñora, en Villaviciosa.