POEX convoca’l II Concursu de Videopoemes n’asturianu o castellanu

La cuarta edición de POEX, ciclu de llinguaxes poéticos, yá ta en camín. Echa a andar col II Concursu de Videopoemes pa obres audiovisuales n’asturianu o castellanu, que da accesu a la programación oficial a los meyores trabayos presentaos.

Hasta’l 28 de febreru al meudía ye posible presentar videopoemes, esto ye, pieces nes qu’haya un poema recitáu y imáxenes en movimientu, cola posibilidá d’introducir música y elementos sonoros. “Trátase poro d’una obra artística basada na integración d’imaxe en movimientu, soníu y llinguaxe verbal: instalación videopoética, net art, video clip, cinepoesía, etc”, espliquen les bases.

El llargor máximu ye de 2 minutos y 15 segundos, con temática llibre, en formatu mpg, mpeg, mp4 o mkv. Ha dir acompañáu d’un documentu Word nomáu ‘Plica’ con tolos datos y unviáu conxuntamente al traviés de We Transfer al corréu electrónicu fmc@gijon.es.

Un xuráu formáu pol alumnáu del Llaboratoriu de Poesía Visual de la Escuela Superior d’Arte Dramáticu de Xixón y presidíu por Begoña Martínez, secretaria del centru, va facer una escoyeta de los meyores videopoemes, que van pasar a formar parte de la programación de POEX 2023, previstu del 18 al 25 de marzu. Les ocho más votaes van proyeutase nuna de les sedes, ente otros llugares y espacios, y el ganador va recibir el premiu na previa del actu de clausura del festival.

La merecedora del primer gallardón na edición pasada foi Isabel Martin con 'Moraícas', creación audiovisual del poema recoyíu nel llibru 'Una cosa es una cosa y otra cosa es otra cosa' (A Fortiori Editorial, 2021).