L’Antiguu Institutu acueye les primeres xornaes de l’Asociación Grana n’alcordanza de Yolanda González Huergo

‘(Sobre)vivir n’Asturies. Presente y futuru del territoriu y la so población’ ye’l títulu de les primeres xornaes qu’entama Grana, asociación creada n’alcordanza de Yolanda González Huergo pa xenerar espacios de reflexón y esparder la forma de ver el mundu de la xixonesa. Va axuntar a espertos na materia en dos sesiones, vienres y sábadu, nel Centru de Cultura Antiguu Institutu.

N’agostu del 2020 la militante asturianista dexábanos de manera prematura cuando ocupaba’l cargu de vocera del grupu municipal de Podemos-EQUO. Dende entós dellos foron los homenaxes na so memoria, lo qu’amuesa la gran buelga dexada por una persona involucrada en dellos movimientos, como la reivindicación llingüística o la defensa de los derechos humanos.

Collacios y compañeros de so, col enfotu de caltener esi espíritu que representaba Huergo, fundaron Grana, asociación qu’en setiembre diose a conocer con dos planes, nun primer momentu, en mente: la celebración d’unes xornaes de calter biañal y un premiu d’investigación en llingua asturiana. Les primeres van celebrase mañana y el sábadu nel salón d’actos del Centru de Cultura Antiguu Institutu baxo’l títulu ‘(Sobre)vivir n’Asturies. Presente y futuru del territoriu y la so población’.

Ésta va tratar “la forma y repartu de los recursos n’Asturies, la ordenación del territoriu y la evolución del repartu poblacional”, cola intención de "valorar, nun espaciu de debate y reflexón, cómo los planes y los debates actuales sobre los desarrollos urbanísticos, la evolución demográfica, el despoblamientu de les ales y los planes de desenvolvimientu económicu van condicionar el futuru d’Asturies". Va arrancar a les 19 hores conferencia 'Un casino en plena selva. La ordenación del territoriu n’Asturies' a cargu d’Ícaro Obeso, profesor del Departamentu de Xeografía de la Universidá d’Uviéu.

Les xornaes, con accesu de baldre, van siguir el sábadu pela mañana, a les 10.30 hores, con una conversación ente l'arquiteuta urbanista Laura López y Sebastiá Jornet, arquitectu urbanista en Jornet Llop Pastor y profesor del Departamentu d’Urbanismu y Ordenación del Territoriu de la Escuela Técnica Superior d’Arquitectura de Barcelona, baxo'l títulu ‘Territorio: asignaturas pendientes’. Pa finar, va entamase a les 12.30 hores la mesa redonda 'Visiones d’Asturies', na que van intervenir Manuel Maurín, profesor del Departamentu de Xeografía de la Universidá d’Uviéu; Mariana Borissova Boneva, arquiteuta urbanista n'Urbania 2003 y vocal d’Urbanismu del Colegio Oficial de Arquitectos de Asturias; Francisco José Llera Ramo, caderalgu de Ciencia Política de la Universidad del País Vasco/Euskal Herriko Unibertsitatea (UPV-EHU) y direutor del Euskobarómetro; y Ignaciu Llope, psiquiatra y miembru de la Fundación Belenos.