El Festival Al Resve incorpora cultura asturiana a les fiestes del barriu de Cimavilla

Nacíu nel añu 2020, el Festival Al Resve va celebrase per primer vegada esti 2022 “como se pensó orixinalmente, dientro de les fiestes del barriu”, esplicó Miguel Barrero, direutor de la Fundación Municipal de Cultura, Educación y Universidá Popular. “Queríamos un poco más de cultura, non sólo rock y pachanga”, espuso Omar López Colunga, presidente de les Fiestes de Cimavilla, que se recuperen esti añu.

Éstes, Los Remedios y La Soledá, van celebrase del 7 al 18 de setiembre, periodu nel que se va desdendolcar esti festival con un nome tan playu como Al Resve en cuatro puntos del barriu: la plaza La Soledá, la plaza Xovellanos, la plaza Arturo Arias (El Llavaderu) y la plaza La Corrada. Un total de 16 actividaes musicales, de teatru y pasucais onde va tar mui presente la llingua asturiana, vehicular en tola cartelería.

L’actu de presentación tuvo llugar frente a la Casa’l Chinu, col conceyal de Cultura, Manuel Ángel Vallina al frente. “El Festival Al Resve caltiénse fiel a los sos entamos teniendo como exa principal la cultura asturiana, combinando innovación con tradición”, aseguró, col oxetivu “amás de fomentar la llingua asturiana y reforzala. Da-y la importancia que merez”.

Una collaboración colos vecinos de Cimavilla que ye bien recibida. “Queríamos un poco más de cultura, que non sólo fora rock y pachanga. Préstanos la idea”, rescampló López Colunga, que ta entovía pesllando’l programa d’unos festexos “tan llargos” y finando cola decoración del barriu magar la dificultá de nun contar con un llocal afayadizu pa la so ellaboración.

Pela so parte, Barrero celebró que esti sía “el primer añu que se celebra como se pensó orixinalmente, que yera dientro de les fiestes del barriu”. “Nosotros queríamos caltener l’apuesta pola cultura asturiana y queríamos venceyala a un barriu como Cimavilla, que ye l’orixe de Xixón, y la meyor época pa facelo yera cuando Cimavilla celebra los sos díes grandes”, una idea que frenó la pandemia al nun entamase les fiestes, anque’l festival sí se desendolcó estos dos años centrándose “na cultura tradicional dende la so vertiente más purista pero tamién colo que tien que ver coles nueves llectures de la tradición”.

Esti plan caltiénse nesta tercer edición y asina van actuar estes dos selmanes de setiembre Anabel Santiago (miércoles 7); David Varela con ‘Restolando’ y Burbús (xueves 8); Algaire (vienres 9); Alicia Álvarez y David Varela con ‘Cuentos de La Fabriquina’, Urso Dakoff y el Grupu de Baille Tradicional Xeitu (sábadu 10); El Trubiecu y Abéu, y 6 Riales (domingu 11); Héctor Braga (vienres 16); la representación de ‘Caperucita en Muniellos’ por Escenapache, Calea y Pandereteres de Fitoria (sábadu 17); y Los Gascones, Jerónimo Granda y Baxel (domingu 18).

Na semeya, López Colunga y Isabel Abella y Laura Buznego, compañeres na organización de les fiestes; María Xosé Rodríguez López, responsable de la Oficina de Normalización Llingüística; Barrero; y Vallina.