El Molinón pasa’l corte y yá ye posible sede oficial de la candidatura del Mundial 2030

Un xiru nos acontecimientos provocaos pola propiedá nueva del Sporting, el grupu mexicanu Orlegi Sports, avera a El Molinón a repetir como sede mundialista 48 años depués. España y Portugal presenten una candidatura conxunta pa organizar el del 2030 y el campu xixonés ta ente los 15 qu’aspiren a ser ún de los 11 escoyíos.

Nin el Conceyu nin el Gobiernu apostaren por ser sede hasta qu’Alejandro Irarragorri, el presidente nuevu del club xixonés, anunciara’l xueves pasáu el so deséu de qu’El Molinón acoyera partíos d’un Mundial ibéricu. En teoría fuera de plazu, contautaron cola Real Federación Española de Fútbol (RFEF) pa tresmitir l’interés y güei confirmóse la candidatura xixonesa xunto coles 13 yá conocíes y otra incorporación d’última hora, Balaídos.

Asina, amás de Xixón y Vigo, quieren ser sede A Coruña (Riazor), Bilbao (San Mamés), Donostia (Anoeta), Madrid (Bernabéu y Metropolitano), Zaragoza (La Romareda), Barcelona (Camp Nou y Cornellà), València (Nou Mestalla), Murcia (Nueva Condomina), Sevilla (La Cartuja), Málaga (La Rosaleda) y Las Palmas (Gran Canaria). L’Estáu contaría con 11 sedes, polos que 4 de la llista van quedar fuera, y Portugal con 3, de los que 2 van tar en Lisboa (José Alvalade y Da Luz) y 1 en Porto (Do Dragão).

Ampliación a 40.000 espectadores

Nel casu de la candidatura ibérica superáse a la presentada por Marruecos o a la d’Uruguai, Arxentina, Chile y Paraguai, úniques confirmaes, pa qu’El Molinón resultara escoyíu como sede debería entamase una importante reforma de modernización del estadiu. El requisitu fundamental pa poder acoyer 5 o 6 partíos de la fase de grupos ye ampliar l’aforu a 40.000 espectadores –agora raspia los 30.000–.