“El contactu con esta xente motívase en responder qué yera o qué queda d’identidá asturiana”, apunta Casanueva

La Rula Antigua acueye hasta’l 19 xunu la esposición ‘Xente’ de Pablo Casanueva, una revisión de la estrenada nel 2013 en Ribeseya. L’artista esbilla 17 retratos de los 44 orixinales fechos a mayores del so conceyu cuando tenía 15 años como parte d’un proyeutu que buscaba “responder qué yera o qué queda d’identidá asturiana”.

Acompañáu de Miguel Barrero, direutor de la Fundación Municipal de Cultura, Educación y Universidá Popular, que rescampló’l so “llabor nel ámbitu de la imaxe” na temática “de la recuparación de la memoria coleutiva”, el ribeseyanu esplicó al públicu presente detalles de l’amuesa. “Estes semeyes fixéronse ente’l 2012 y el 2015 nun procesu de recuperación de memoria oral, pero tamién fotográfica y d’archivos particulares d’esta xente, y documental en menor midida”, principió.

“El contactu con esta xente ta motiváu en buscar o tratar de responder qué yera eso o si quedaba dalgo d’identidá asturiana, qué yera o qué ye agora. Y paecíame que yera nesta xente mayor, les mayores xeneraciones del conceyu, onde podía topar dalguna respuesta o abrir más entrugues”, añadió Casanueva. “La manera d’entrar yera la fotografía, face-yos un retratu y mantener una conversación con ellos”, siguió’l fotógrafu y realizador.

Esplicó que “nun teníen esos encuentros una metodoloxía antopolóxica, científica, sociolóxica, sinón que yeren encuentros mui naturales ente vecinos de distintes xeneraciones”, polo que los fixo “falando la so llingua”. “Con dalgunos falé munchu, con otros falé menos, y dime cuenta qu’esos alcuentros diéronme la base, el pegoyu, los cimientos, pa construyir depués obres posteriores cinematográfiques al rodiu la Guerra Civil, la memoria colectiva, al trabayu… Foi gracies a estes persones”, aseguró.

Recuperación va dos años

Coles semeyes guardaes nun caxón hasta va dos años depupés de l'amuesa de Ribeseya y otra en Cangues d'Onís, realcontrales llevólu a recuperales pa una esposición que yá se pudo ver na uvieína Sala Borrón y que va tener les sos paraes próximes n’Avilés, Ribeseya otra vuelta y Cangas del Narcea. De les 44 orixinales escoyó 18, qu’en Xixón son 17 por cuenta l’espaciu: “Ye interesante tener qu’adaptase a los espacios, dalgo que nun se da col cine”, espresó.

Cada retratu, toos en blanco y prieto, va acompañáu d’un “apunte”, otres semeyes anteiores o posteriores, en pequeño tamañu y a color, que “quiten peso a la solemnidá” dando-y “cierta rellación col cine” al aportar tamién movimientu. Namái una cuenta con un fondu negru, la única na que sólo emplegó un disparu.

“Toos son mui naturales, nun los moví del sitiu nin modifiqué la escena”, rellata darréu Casanueva. Completa la esposición material qu’amuesen “dalguna historia que me paecía importante reseñar y tamién llabores”, como a la so güela faciendo boroña o’l trabayu del maíz.

Riqueza llingüística

L’asturianu foi, como yá comentara, la llingua emplegada nos alcuentros, llamando-y l’antención al entrevistador “los distintos rexistros llingüísticos” atopaos nun conceyu del tamañu de Ribeseya. “En tan poco territoriu hai trés o cuatro isogloses y una mesma pallabra nomase de distintes maneres”, apuntó.

Por último, confesó que “estos encuentros permitiéronme construyir depués obres posteriores, dende ‘Bernabé’ que foi la primer película que fixi” a ‘Conserveres’ –“una de les persones que participen en ‘Xente’, Lolina, foi conservera y fala nesa pieza”, apuntó– y, la última, ‘8 filmes sobre la guerra’. Esta pieza ye “un repasu, al traviés d’ochos pieces individuales, a la represión franquista en Ribeseya en base a testimonios, semeyes y documentos”, rescampló.

La esposición ‘Xente’ va poder visitase en Xixón hasta’l 19 de xunu. L’horariu de la Rula Antigua ye de miércoles a vienres de 17.30 a 20.30 hores, y los sábados y domingos de 12 a 14 y de 17.30 a 20.30 hores, mentes que los llunes y martes la instalación pieslla.

Na semeya, Casanueva y Barrero.