De 37 actividaes nel Botánicu en primavera namái 3 son n'asturianu

Iniciativa pol Asturianu llamenta la mínima presencia de la llingua asturiana na programación de la instalación.

'El viaxe de Poli y Meli' (vienres y sábadu), 'La bruxa Maruxa' (15 de mayu) y 'Deva la caparina' (12 de xunu), les trés de Factoría Norte'l y con trés sesiones n'asturianu y otres trés en castellanu, son les úniques actividaes na llingua propia ente les 37 previstes nel Xardín Botánicu Atlánticu esta primavera. Amás, el folletu informativu asoleyáu namás tien versión castellana.

La organización, qu'ufre estos datos, reclama al Conceyu de Xixón "un incrementu de la presencia d’actividaes n’asturianu nel Xardín Botánicu en cumplimientu del Plan de Normalización Llingüística pal periodu 2020-2023". Asina, recuerda que'l documentu aprobáu pol Plenu municipal n'agostu de 2020 recueye nel puntu 56 el compromisu pa "asegurar la esistencia d’una ufierta cultural n’asturianu (musical, teatral, cinematográfica, de cómic, etc) pal públicu infantil y xuvenil aprovechando la programación y los eventos culturales y d’ociu organizaos pol Conceyu", como ye'l casu d'esta instalación municipal.

Na semeya, la bruxa Maruxa.