El plazu pa matriculase al cursu en llinia de ‘Llingua Asturiana’ de la Universidá Popular fina’l día 11

Entá queden 4 places llibre pal cursu ‘Llingua Asturiana’ de la Universidá Popular, que se torna a ufiertar namái en llinia. Hasta’l vienres va tar abierta la matrícula pa ésta y les otres 128 propuestes en delles estayes que conformen el programa que se va desendolcar nos próximos meses n'espacios diferentes del conceyu.

De nivel básicu, les clases d’asturianu van contar con una metodoloxía práutica y amena pa introducir a los alumnos nes normes gramaticales, el léxicu y la ortografía pa poder falar y escribir con correición. También va facese un averamientu a los recursos esistentes y la lliteratura en llingua asturiana.

Al ser les clases tresmitíes en direuto los martes de 20 a 21.30 hores, va ser posible la práutica oral del alumnáu. El cursu, de 40 hores llectives, cuenta con 14 places, de les que queden 4 llibres, y tien un preciu de 40 euros.

Ciencia, artesanía o historia

La Universidá Popular ufierta en dellos espacios del conceyu y en llinia un total de 129 propuestes d’artesanía y artes aplicaes; fotografía y videu, historia, arte y patrimoniu; informática y Internet; llingua y lliteratura; naturalenza y ciencia; o teatru y danza, ente otres munches estayes. Asina, por exemplu, entámense cursos sobre la ‘Historia de Xixón a través de sus museos’, ‘La Tierra vista desde el espacio: satélites y clima’, ‘Cocina: iniciación’, ‘Xixón: la ciudad fotografiada’, ‘Aves en el Cabo Torres’, ‘Taller de microrrelatos’ o ‘Hórreos asturianos: singularidad, sencillez y excelencia’, toos en castellanu.