Jony y Eric Ramírez, pólvora pal ataque del Sporting, que firma a última hora a Calavera

Nun mercáu ivernal paráu en Xixón hasta la selmana última, el Sporting fai trés incorporaciones pa nun dar por finada la temporada y lluchar pol play-off. La vuelta de Jony Rodríguez dende la Lazio ye’l fichaxe más ilusionante pa l’afición, que ve tamién como torna Jordi Calavera pa cubrir la lesión de Guille Rosas y espera la llegada del internacional venezolanu Eric Ramírez.

A siete puntos del sestu, el Cartagena, y en decimotercera posición, el conxuntu roxiblancu afronta les 17 xornaes últimes de Lliga. Una distancia pa nada insalvable, pero la dinámica última del equipu nun convidaba a la esperanza a una afición que vio al equipu líder na xornada 10.

La cesión de Jony pretende precisamente llevantar l’ánimu de los siguidores y aportar soluciones ofensives a Gallego. La dulda principal del fichaxe, la falta de ritmu competitivu del de Cangas, ensin ficha n’Italia, nun futbolista que basa bona parte del so xuegu na esplosividá.

P’aprovechase de les asistencies del estremu va aportar a Xixón Ramírez, delanteru de 23 años internacional absolutu con Venezuela nestos momentos convocáu cola ‘vinotinto’ pa la lliga de clasificación pal Mundial de Qatar, yá ensin opciones. Con 1,90 metros d’altura y bon remate de cabeza, vien cedíu del Dinamo de Kiev, col que xugó Lliga de Campeones, con opción de compra y el retu de competir el puestu de ‘9’ con Djuka.

Completa los fichaxes ivernales Calavera, que coincidiera con Jony na etapa última del futbolista en Xixón con Baraja nel bancu. Tamién cedíu, pol Girona nesti casu, ye una incorporación obligada pola lesión de Guille Rosas al quedar namái con Bogdan nel puestu.

Ampliación de Mareo

Les perres del fondu CVC al traviés de ‘LaLiga Impulso’ permite al Sporting reforciar l’equipu ensin tener que buscar salíes de futbolistes. El 75 por cientu del total del ingresu, que va tar en poco más de 20 millones d’euros, según les previsiones ha destinase a inversiones en posicionamientu internacional, dixitalización o instalaciones, y el proyeutu nel que trabaya’l Sporting ye la merca d’una finca cercana a la Escuela de Fútbol de Mareo de mayor tamañu que l’actual p’ampliala y llevantar equipamientos y una residencia pa nuevos valores.