El I Premiu de Novela Curtia Andrés Solar foi pa Milio Rodríguez Cueto

El Conceyu de Xixón dio anuncia del fallu y entregó’l I Premiu de Novela Curtia Andrés Solar Santurio esti llunes 27 d’avientu, cuando se cumplen 37 años de la muerte de “ún de los adelantaos del movimientu de resurrección de la lliteratura en llingua asturiana”. Asina se refirió al autor de Deva’l ganador del gallardón, Milio Rodríguez Cueto, que presentó la obra 'Fortuna' a esti concursu de creación nueva.

El recuerdu a tan queríu escritor tuvo presente en tou momentu del actu celebráu nel Centru de Cultura Antiguu Institutu, que contó cola presencia de la so hermana Lali Solar y el maríu d’ésta, Jesús Rodríguez. Miguel Barrero, direutor de la Fundación Municipal de Cultura, Educación y Universidá Popular, encargóse d’abrir el mesmu cola llectura del acta del xuráu que presidió y qu’escoyó’l trabayu ganador d’ente los once presentaos, que lleva una recompensa de 3.000 y la espublización de la historia, cola intención de presentala na próxima Feria del Libro de Xixón.

Ésti tuvo formáu por Laura Marcos, filóloga de la Direición Xeneral de Política Llingüística; Marta Mori, vicesecretaria de l’Academia de la Llingua Asturiana; Migue Rojo, representante del Conseyu Asesor de la Llingua Asturiana; y María Xosé Rodríguez López, responsable de la Oficina de Normalización Llingüística, que fixo amás de secretaria. Por mayoría decidióse por ‘Fortuna’, escrita baxo’l nomatu Kostas de Bizancio, que resultó ser Rodríguez Cueto.

De la mesma rescamplóse la so “fondura psicolóxica” y la so recreación de “paisaxes urbanos y periurbanos d’una Asturies real y cotidiana na que se reflexen esperiencies y emociones personales con un usu del llinguaxe mui natural y procurosu, lo que fai, en conxuntu, una obra mui interesante”. Sobre’l ganador, Barrero apuntó que “ye ún de los nomes destacaos de la lliteratura asturiana d’anguaño. Poeta, ensayista, traductor, editor, novelista...”, pa recordar depués dalgunos de los sos munchos reconocimientos algamaos na so trayeutoria, ente los que tán dos Máximo Fuertes Acevedo d’ensayu o un Xuan María Acebal de poesía.

Años de repasu y correiciones

Les primeres pallabres de Rodríguez Cueto foron pa recordar a la persona que da nome al premiu y a la señalada fecha, l’aniversariu de la perda nun accidente de coche de Solar, “ún de los adelantaos del movimientu de resurrección de la lliteratura en llingua asturiana que dieron esos primeros pasos nesi camín que lleva unos cuantos años andáu y que paez que poco a poco va faciéndose más sólidu”. No que respeuta a ‘Fortuna’ bromió con que pa él presentala a concursu foi “como cuando te saquen una muela d’eses que te lleven tiempu atormentando”, porque “esta novela terminéla va unos cuantos años y yo soi mui obsesivu y repaso y repaso, y corrixo. Entós yá diba siendo hora de quitala de delantre”.

Por último, deseó que’l Premiu de Novela Curtia Andrés Solar Santurio “tenga un futuru llargu y trescendente, y que sía una referencia na lliteratura n’asturianu”. Con él el Conceyu quier “promover la creación lliteraria n'asturianu y al tiempu facer alcondanza de la figura del escritor xixonés Andrés Solar y lo so querencia pola llingua de nueso y la so normalización social”.

Jesús Rodríguez, Milio Rodríguez Cueto con un cuadru cola figura d'Andrés Solar y unos versos como troféu, y Lali Solar, depués de la entrega del premiu.