Un llibru billingüe cuenta'l procesu de fundación del UC Ceares

Va presentase nun actu nel chigre La Santina de Ceares poco enantes del partíu col Compostela.

'Los anicios d'un club de barriu' ye'l nome de llibru editáu con motivu del 75 aniversariu del Unión Club Ceares que cuenta el procesu de fundación del equipu de Ciares. El so autor ye Roberto González Álvarez, mentes que s'encargó de la torna al asturianu Vítor Xuan Melero.

Anque yá ta a la venta, la presentación oficial de la obra va tener llugar el sábadu a les 12 hores en La Santina de Ceares. A pocos metros, en La Cruz, los de Pablo Busto van xugar a les 15.45 hores el partíu correspondiente a la xornada 16 del grupu 1 de la Segunda RFEF contra'l Compostela, tercer clasificáu.

Pa esti partíu'l club entama una recoyida d'alimentos non perecederos pa xente necesitao en collaboración cola Despensa d'Alimentos de la Casa Sindical.