El Sporting va al derbi n’ascensu direutu

Depués de trés deceiciones, el Sporting nun se pue permitir tornar de vacíu esti sábadu del Carlos Tartiere Nuevu. Los de Gallego van al derbi asturianu n’ascensu direutu llueu d’un gran arranque de temporada y, magar l’ausencia d’afición roxiblanca organizada n’Uviéu, confíen en regalar una victoria ilusionante a la hinchada.

Asturies prepárase pa vivir mañana (21 hores, Vamos) el derbi más esperanzador pa les dos aficiones de les temporaes últimes. Los dos equipos ocupen posiciones altes que permiten suañar con lluchar por opositar al saltu de categoría.

El que meyor empezó foi'l Sporting, visitante mañana, qu'ocupa la segunda plaza a 1 puntu del líder, la UD Almería. Los roxiblancos pierden pal choque de rivalidá al Puma Rodríguez, titular ayeri na derrota de Panamá con El Salvador (0-1) nes eliminatories de la Concacaf pal Mundial de Qatar del añu qu'entra, y a Gaspar, convocáu per primer vegada cola seleición española sub-21, amás del ex azul Christian Rivera por lesión.

Pela so parte, Ziganda nun va poder contar con Conrud, Luismi y Jirka, llamáu por Eslovaquia, y recupera a Sangalli. Vencedor nos últimos trés enfrentamientos, l'Uviéu ocupa la sétima posición, a 6 del Sporting y a 2 de les eliminatories pol ascensu, que marca Las Palmas.

Ensin coloríu roxiblancu

Nun habrá públicu visitante de manera organizada na grada, por mor de la negativa de la entidá y l'afición a aceptar les llacerioses condiciones de viaxe marcaes pola Delegación del Gobiernu estatal n'Asturies. Sicasí, los xixoneses nun van tar solos nel Tartiere al traviés d'entraes d'acompañantes xestionaes con amistaes socies del club azul.

Na imaxe, un grupu de los numberosos aficionaos qu'acudieron güei a Mareo a animar al equipu nel entrenamientu d'esta mañana.