La FIDMA adáptase a la situación y recibe la confianza d'espositores y visitantes

Yá ta en marcha la LXIV Feria Internacional de Muestres d’Asturies (FIDMA), ún de los eventos centrales del branu xixonés, cola confianza de visitantes y espositores. Son 600 los que presenten los sos productos nel recintu, adaptáu a la situación pola pandemia de COVID-19, con un 85 por cientu de los puestos al aire llibre.

Llueu d’un añu de parón obligáu, la FIDMA torna a abrir les sos puertes. Dende’l sábadu yá hai actividá nel Recientu Ferial Luis Adaro, preparáu pa celebrar esta edición con toles midíes de seguranza.

El máximu d’aforu ye del 50 por cientu, tanto nos pabellos como na totalidá de la Feria, y pa evitar grandes axuntamientos de xente, nun va haber los tradicionales díes dedicaos a entidaes financieres o coleutivos. La disposición de los puestos fai qu’un 85 tea al aire llibre y la mázcara ye obligatoria en tou momentu pa reducir la posibilidá de contaxos.

L’esfuerciu organizativu tuvo la respuesta positiva de los espositores, con unos 600 presentes, y del públicu, qu’acudió en bon númberu nos trés primeros díes del eventu. La FIDMA va tar abierta hasta’l día 22 n’horariu de 11 a 22 hores.

Na semeya, puestu d'Iniciativa pol Asturianu na FIDMA, na que la organización comparte espaciu con nueve empreses que cuenten con productos y servicios en llingua asturiana.