El nivel d’alerta 4+ nun trai toque de queda, pero sí llende d’axuntamientos

Esti llunes activóse en Xixón y n’otros 7 conceyos, per 14 díes, el nivel d’alerta 4+ al tener una incidencia acumulada superior a 350 casos por cada 100.000 habitantes. El Tribunal Superior de Xusticia d’Asturies (TSXA) refugó’l pidimientu del Gobiernu pa poner toque de queda, pero sí que llendó los aconceyamientos de non convivientes.

L’autu entiende que la restricción de la movilidá nocherniega, pretendida de 1 a 6 hores, afeuta a derechos fundamentales y que, pola situación sanitaria actual d'Asturies, nun da llugar a esta midida. Sicasí, dio’l preste a la limitación de los axuntamientos, que nun pueden superar les 10 persones n’esterior; mentes, el Gobiernu recomienda que nun se pase de 6 n’interior.

Esta midida entró a valir esta madrugada y va tar activa per 14 díes en Xixón y en Carreño, Gozón, Llaviana, Mieres, Uviéu, Siero y Villaviciosa. Son los conceyos de más de 10.000 habitantes que cuenten con una indencia acumulada mayor a 350, lo qu’implica l’activación automática, anque la tendencia actual de la cuarta fola ye descendente.

En concreto, en Xixón ye de 684,17 casos, según la actualización última correspondiente a ayeri. El xueves, xornada na que’l conceyu entró en riesgu estremu, taba en 734,59.

Na semeya, la cai Corrida esta tarde enllena de xente.