El Sporting busca escaecer la imaxe amosada nos derbis últimos con un trunfu al Uviéu n’El Molinón

David Gallego y los sos xugadores tienen esti sábadu una oportunidá d’oru pa dar un reblagu nel so oxetivu de consolidar les places d’eliminatoria d’ascensu. El Sporting recibe a un irregular Uviéu nun derbi ensin públicu nes graes nel que los roxiblancos han d’escaecer la imaxe de los últimos duelos de rivalidá.

Dos derrotes siguíes, col Mirandés (1-2) y el Tenerife (1-0), fixeron esvanecer los suaños llonxanos d’ascensu direutu de los xixoneses pola superioridá y regularidá que tán amosando Espanyol y Mallorca, col Almería como aspirante a aprovechar un resbalón de catalanes o baleares, pero los pinchazos de los persiguidores faen que caltengan intautes les sos aspiraciones de promoción: quintos con 56 puntos de ventaya colos sétimos, el Girona, con 49 –anque’l Mirandés podría llegar a los 50 de ganar el partíu que tien aplazáu–. David Gallego recuperar pal choque a Campuzano, Rosas y Gragera, lo que-y da más opciones, sobre manera na delantera, escasa d’efeutivos, pola vuelta del catalán.

Enfrente va tar un Uviéu qu’acumula 7 partíos ensin ganar, dende’l 28 de febreru, cuando superaron al Zaragoza por 1-0 nel Tartiere nuevu, y que necesita sumar pa nun metese en problemes. José Ángel Ziganda convoca pal choque per primer vegada al xuvenil Cardero y tien les duldes de Viti y Javi Mier que, sicasí, van viaxar a Xixón.

El balón va echar a rodar a les 18.15 hores coles cámares de Vamos d’úniques testigues. A l’afición, poro, tocara-y velo pela tele en casa o nos chigres, coles terraces como la opción preferida pa siguir el nuesu derbi, anque por seguridá, nun va poder ser na de los establecimientos d’El Molinón.