Una placa yá recuerda a Ed Johnson na pista central del Palaciu

L’alcuerdu de la xunta de gobiernu del 2016 pa que la pista central del Palaciu lleve’l nome del ex entrenador del Gijón Baloncesto Ed Johnson escenificóse con un actu al qu’acudió la so familia, residente n’Atlanta. Una placa yá recuerda a esta figura tan querida.

Llegó nel 1984 pa dirixir al históricu club despaecíu por deudes nel 2009 y en Xixón quedó, siempre venceyáu al Gijón Baloncesto y a cualquier proyeutu col deporte de la canasta nel conceyu, como la Fundación Gijón Baloncesto. Un ximnasiu nel barriu de Pumarín sería’l so mou de vida hasta que decidió que, nel 2011, yera la hora de tornar al so país.

Ehí retiróse hasta la so muerte nel 2016, con 71 años. Una noticia que tuvo gran repercusión en Xixón y n’otros llugares onde dexó la so buelga como xugador, como Manresa y Badalona.

Dende güei una placa recuérdalu a la entrada de la pista central del Palaciu, que lleva’l so nome. Esta mañana la so familia pudo vivir un homenaxe a la so memoria por parte del Conceyu y el baloncestu xixonés.