'Anatomía de una habitación propia', de Kamante Teatro / ESTRENA ABSOLUTA

Cantu a la vida en xeneral y a la vida de cualquier muyer en particular. Al traviés de notes biográfiques de l'actriz-baillarina y testos de Las Sinsombrero, Kamante Teatro quier dar voz y presencia d'una forma distinta a los habituales (que non comunes) homenaxes y reconocimientos a estes muyeres qu'hai cuasi un sieglu revolucionaron l'ámbitu cultural y güei siguen siendo desconocíes por munches persones.

Partiendo del escenariu como rincón íntimu y complexu de l'actriz-bailarina, de los recovecos emocionales, ábrense les puertes d'esa intimidá de par en par pa compartila col públicu, esi grupu de voyeurs que serán cómplices y testigos del viaxe pel amor, el desamor, la espera o la maternidá y la infinidá de sensaciones que producen en cuerpu y mente de la muyer. 'Anatomía de una habitación propia' ye un espectáculu unipersonal y intimista, nel que pretendemos diseicionar dalgo tan íntimo como ye'l 'cuartu-emocional' de l'actuante con partitures físiques d'enorme potencia y fraxilidá y un testu orixinal escritu dende la honestidá de lo cotidiano.