La Universidá Popular ufierta 128 cursos presenciales y en llinia, ente ellos el básicu de Llingua Asturiana

Yá ta abierta la convocatoria de la Universidá Popular pa esti iviernu-primavera, que se va pesllar el día 26. En total ufiértense 128 cursos a metá d'aforu en diferentes centros municipales de la villa, de los que per primer vegada 12 van ser en llinia, ente ellos el de Llingua Asturiana, de nivel básicu, los martes a les 20 hores.

La situación actual pola pandemia de COVID-19 nun frena una iniciativa de tantu ésitu como ye la Universidá Popular. Pa poder desendolcáse rebáxase l’aforu de les clases presenciales, onde los asistentes han de guardar toles midíes de seguranza, y tamién s’entamen cursos en llinia per primer vegada.

Ente estos últimos ta’l de Llingua Asturiana, de nivel básicu: “Con una metodoloxía práutica y prestosa vamos dir afondando en normes gramaticales, nel léxicu y na ortografía pa poder falar y escribir con correición. Tamién va facese un averamientu a los recursos esistentes y la lliteratura n'asturianu. Les clases en streaming y en direuto van permitir la práutica oral y van facilitar l'asimilación de los conteníos del cursu”, esplica la convocatoria.

Les clases van tener llugar tolos martes a les 20 hores, con 90 minutos de llargor, dende'l 9 de marzu. El preciu de la matrícula ye de 40 euros y el númberu de places máximu, 14.

Na semeya, Liliana Fernández-Peña, xefa de departamentu de la Universidá Popular, y Alberto Ferrao, conceyal d'Educación y Cultura.