El Conceyu aprueba un conveniu cola ALLA

La xunta de gobiernu llocal aconceyada esti martes de manera telemática dio’l preste a un conveniu cola Academia de la Llingua Asturiana (ALLA). Ésti tien como oxetivu la promoción, difusión y dignificación social del usu del asturianu nel conceyu de forma conxunta, principalmente na alministración llocal.

L’alcuerdu ente l’Ayuntamietu y la institución académica va tar vixente hasta’l 31 d’avientu del 2021 y va poder prorrogase dos años más, con renovaciones añales. Dase asina continuidá a una collaboración que nel pasáu permitió iniciatives numberoses conxuntes, como por exemplu la espublización d’un facsímil de ‘Sol en los pomares’ de Matías Conde.

El desarrollu de los diferentres programas y actividades que s’entamen en Xixón “requier, en dalgunas materies, una especialización y un conocimientu científicu pa la so execución correuta, polo que ye necesario xunir los esfuercios y los recursos humanos y téunicos esistentes y promover la coordinación de les aiciones distintes que se faen dende los sectores interesaos na materia, polo que se vienen estableciendo contautos, ente otros, col movimientu asociativu y científicu de la ciudá y, ente ellos, cola Academia de la Llingua Asturiana”, espliquen dende l’Ayuntamientu. L’oxetivu final ye la promoción, difusión, enseñanza y normalización del asturianu nel conceyu.