L’ALLA detalla’l conveniu robláu col Conceyu pa la normalización social del asturianu

El 1 d’avientu la xunta de gobiernu llocal dio’l preste a un conveniu cola Academia de la Llingua Asturiana (ALLA) –que nun ye de naturaleza económica– con vixencia hasta’l 31 d’avientu, prorrogable añu a añu hasta'l 2023. El testu afita la collaboración na normalización social del asturianu y l’asesoramientu llingüísticu de la institución al Conceyu.

L’alcaldesa Ana González Rodríguez y el presidente de l’ALLA, Xosé Antón González Riaño, repasaron y valoraron nun alcuentru celebráu’l 30 d’ochobre del 2019 los avances últimos na normalización social del asturianu dientro de l’aición del Conceyu. Nesi alcuentru apautaron les bases d’esti conveniu que tien como fundamentu la Llei d’Usu y Promoción del Bable/Asturianu.

La institución académica detalló esta mañana nun comunicáu dalgunos de los alcuerdos del testu, como l’asesoramientu llingüísticu “nel desendolcu de les sos xeres y actividaes de promoción del idioma nos actos públicos y na vida diaria del Conceyu”. Tamién la coordinación xunto col gobiernu municipal de la “política de normalización social nel conceyu”.

El compromisu del Ayuntamientu céntrase en “siguir completando la rotulación n’asturianu de los sos servicios y dependencies, asina como de la rede viaria, igual na zona urbana que na rural”, pa lo que solicita propuestes normatives nesti ámbitu. Mentes, l’ALLA va siguir participando nel Conseyu Asesor de la Llingua de Xixón y nos xuraos de los premios lliterarios convocaos pol Conceyu pa la promoción del idioma, y “oblígase a aconseyar y revisar el trabayu de recoyida de la toponimia xixonesa con vistes a la edición de los cartafueyos correspondientes a les 19 parroquies qu’entá queden por estudiar”.

Por último, inxerirá a Xixón como llugar d’espardimientu de les sos xeres editoriales, formatives y culturales y facilitará a la Oficina de Normalización Llingüística un exemplar de caúna de les obres del so fondu editorial.

Na imaxe, 'Estaciones', el proyeutu ganador del III Premiu Fierro Botas a la Meyor Idea Normalizadora qu'entama la Oficina de Normalización Llingüística ente escolinos del conceyu. Semeya propiedá del SNL xixonés.