Salú entama un cribáu ente ciudadanos de 30 a 50 años de cinco barrios y parroquies

El Serviciu de Salú del Principáu d’Asturies (SESPA) prepara un cribáu en Xixón pa detectar asintomáticos o presintomáticos. Les autoridaes sanitaries llamen a participar nél a los ciudadanos d’ente 30 y 50 años que residan con mayores de 65, nun fixeran un PCR nel mes anterior y nun pasaran entovía la COVID-19.

El Serviciu de Vixilancia Epidemiolóxica y la Direición Xeneral de Salú Pública fixeron un estudiu sobre les zones que se podíen beneficiar d’un cribáu adicional, escoyendo finalmente a les que pertenecen al códigu postal 33209 na franxa d’edá de 30 a 50 años al ser la que tien un mayor interés epidemiolóxicu, inferior a la que se seleicionó, por exemplu, nos conceyos de la cuenca del Nalón. En concreto, son residentes de zones d’El Llano, Roces, Ciares, Tremañes y Contrueces.

Encamiéntase a les persones que tengan esi códigu postal y cumplan col perfil a rellenar esti formulariu o llamar al númberu de teléfonu 984.10.04.00 pa recibir una cita. El SESPA comunicará darréu al dispositivu móvil personal el llugar y la hora onde ha d’acudir a facer la PCR pa la deteición de la enfermedá causada pol coronavirus SARS-CoV-2.

Nel mapa, zona que correspuende al códigu postal 33209.