El Festival Al Resve allarga’l branu en Cimavilla

Los Remedios y La Soledá, esto ye, los dos festexos de Cimavilla, ponen el ramu tolos años al branu xixonés. Esti 2020 yá se conocía dende enantes de la pandemia la decisión de los vecinos de non organizar les fiestes, pero la música y el teatru nun van faltar col Festival Al Resve qu’entama’l Conceyu.

Dende’l sábadu y hasta’l día 20 van programase numberoses actividaes nel barriu altu con toles midíes de seguranza. La plaza de La Soledá, el sábadu, va abrir los conciertos con Las Eléctricas (13 hores) y David Varela & Javier Lueje cola so propuesta ‘Cuentos en Cantaos’ (19 hores), mentes que los restantes van tener como sede la Colexata con una importante presencia de música n’asturianu: L’Aldu (xueves 10), L-R (vienres 11), Jerónimo Granda (sábadu 12), La Bonturné (domingu 13), José Manuel Tejedor (xueves 17), Algaire (vienres 18), Elola y Andersons (sábadu 19) y Silvia Quesada (domingu 20).

Estos conciertos van tener un pase doble, a les 19 y a les 20.30 hores, y p’acudir ye necesario acutar plaza na direición museos@gijon.es. Tamién pa les dos representaciones de teatru (en doble sesióna les 18 y a les 19.30 hores) en L’Atalaya, ‘Carloni y Corcherini’ por Higiénico Papel el martes 15 y ‘El retablo de las maravillas’ por Teatro del Cuervo el miércoles 16, y el taller d’averamientu al skate nel skatepark el xueves 17 y el vienres 18 a les 17 y a les 18.30 hores.

Na semeya, el conceyal d'Educación y Cultura, Alberto Ferrao; y el direutor de la Fundación Municipal de Cultura, Educación y Universidá Popular, Miguel Barrero, na presentación del certame.