Morrió Yolanda González Huergo, conceyal y vocera de Podemos-EQUO nel Conceyu de Xixón

Candidata a l’alcaldía nes eleiciones pasaes, foi una destacada militante de la Xunta pola Defensa de la Llingua Asturiana.

Nacida en Xixón hai 49 años, nun pudo superar l’últimu pilancu que-y punxo la enfermedá y que la llevó a pasar esti últimu mes nel Hospital de Cabueñes.

Llicenciada en Derechu pola Universidá d’Uviéu, yera téunica nel area d’urbanismu del Conceyu de Siero, puestu que dexó temporalmente al salir conceyal de Podemos-EQUO nes pasaes eleiciones en Xixón. Foi candidata a l’alcaldía y anguaño yera vocera del so grupu.

Na so trayectoria rescampla’l so compromisu y dedicación nel movimientu de reivindicación llingüística como militante de la Xunta pola Defensa de la Llingua Asturiana, coleutivu nel que participó activamente dende finales de los años 90.
Podemos foi la organización na que Huergo centró la so vida política nos últimos; venceyada dende siempres al asturianismu y al nacionalismu d’izquierdes militó en Izquierda Asturiana organización dende la que participó na configuración de la coalición Unidá, la reconstitución de la Unidá Nacionalista Asturiana y la coalición electoral Compromisu por Asturies, na que participaron el Bloque por Asturies y la UNA, ocupando Yolanda Huergo’l númberu 2 na llista electoral de la circunscripción central d’Asturies en 2011 y 2012.

Tres la creación de Podemos en 2014, Compromisu por Asturies, yá constituyida en organización, decide la integración de la so militancia en Podemos Asturies, momentu nel que Huergo s’incorpora al partíu moráu.

Amás, tamién ye de destacar el so activismu en defensa de los derechos humanos que la llevó a militar n’Anmistía Internacional, organización de la que llegó a ser coordinadora en Xixón.

Dende Yexixon.com quedemos unviar un fuerte abrazu a la so familia y rendir homenax a Yolanda. Tamos seguros que la so xera y recuerdu servirá d’inspiración pal movimientu asturianista y pa tola xente que cree na necesidá d’una aición política pensada por y p’Asturies.