Entamen les sanciones a bicicletes y patinetes que circulen pela cera

La Policía Llocal fixo una campaña informativa a los usuarios nesta selmana última.

Dende güei cualquier persona que circule en bicicleta o patinete llétricu pela cera o por espacios non permitíos va ser multáu con sanciones que pueden llegar a los 200 euros. Ye una midida entamada pol Conceyu de Xixón pa favorecer la seguridá y la convivencia ente toles persones usuaries de la vía pública.

El llunes pasáu púnxose en marcha una campaña informativa cola fin de dar a conocer les intenciones del equipu de gobiernu municipal, con repartu de folletos y paraes d'alvertencia, asina como les alternatives esistentes pa circular ensin molestar al peatón. Los carriles-bici y los 29 ciclocarriles, compartíos colos coches y llendaos a 30 quilómetros per hora que s'habilitaron recién nel conceyu, son los llugares habilitaos pa bicicletes y patinetes llétricos, que de nun haber estos espacios per onde circulen habrán d'utilizar siempre la calzada.