El branu yá tien cartelu, centráu na salú

De momentu la imaxe del estivu xixonés namái cuenta con versión en castellanu.

Xixón, como'l restu del hemisferiu norte, vive un branu diferente. La crisis sanitaria pola pandemia de la COVID-19 nun invita a la folixa y, por esti motivu, el cartelu d'esti añu pa promocionar les actividaes d'esta época del añu del Conceyu de Xixón céntrase na salú.

La so autora ye la diseñadora xixonesa Noelia Pañeda (Pasajero 37). Nel mesmu pue vese representada una botella de sidra que simboliza un árbol cola pallabra castellana 'Salud' na que la 'u' tien forma de vasu.

"El diseñu ye una invitación a compartir; a brindar con sidra, una bébora mui social; a disfrutar del ociu nos espacios abiertos; al aire llibre… Y el deséu de qu'esti branu haya salú pa toos", esplica Pañeda sobre esti cartelu que va ser la imaxe de les actividaes entamaes pol Conceyu.