El Sporting nun devuelve les perres de los abonos

Ufre descuentos pa los de les temporaes próximes, entraes y descuentos nes tiendes oficiales o facer una donación a la Fundación.

El Sporting ta acabante de confirmar que nun va devolver les perres de los abonos polos 5 partíos que queden por xugar n'El Molinón. La opción que da a los aficionaos con carné ye una serie de compensaciones que repercutan nel club.

Asina, aquellos que quieran renovar tiene la opción de contar con un descuentu del 15 por cientu nel abonu de la temporada próxima, que nun ye seguru que se pueda xugar con públicu, o del 20 poles dos siguientes, un 10 en caúna. Mentes, a los que quieran esborriase les opciones de compensación qu'ufre'l Sporting son un bonu-descuentu del 15 por cientu del costu del so abonu pa entraes sueltes –a esceición de posibles 'Día del Club'–, productos de les tiendes oficiales y descuentos pa visitar el 'Espacio Quini'.

Una tercer posibilidá ye donar les perres a la Fundación Escuela de Mareo Real Sporting de Gijón, que traerá dellos beneficios. Los abonos de les persones que se decidan por esta opción van llevar nel carné la referencia '#apoyoRSGCovid19'.

Los aficionaos deberán comunicar la so decisión na campaña de renovación pa la campaña 2020-2021.

Na semeya, un momentu del Sporting-Las Palmas (4-0), últimu partíu de la temporada que los sportinguistes pudieron disfrutar n'El Molinón.