Ana González llama a los vecinos “a nun tirar porquería” peles ventanes

“Ye importante qu’ente tol mundu caltengamos la llimpieza de les nueses cais”, apuntó Ana González nun de los comunicaos que ta faciendo con motivu del mandáu de quedar en casa pola pandemia de COVID-19. EMULSA ta detectando basura llanzada dende les ventanes, polo que l'alcaldesa llama “a nun tirar porquería”.

“Les cais nun son un basureru”, recordó esti llunes, y pidió a la ciudadaná que “cumplamos cola so llimpieza”. Principalmente la suciedá ta causada por paves anque nel so mensaxe González tamién fixo referencia a un aumentu de les cagaes de perru que los sos dueños nun recueyen cuando los saquen a pasiar.

Dende que comenzó l’estáu d’alarma l’alcaldesa vien asoleyando comunicaos a les y los xixoneses dende’l so despachu de manera diaria con delles informaciones y recomendaciones. Na última, ayeri, informó que 86 persones foron denunciaes el llunes por “nun quedar en casa”, anunció que diez empreses del conceyu “tán collaborando, trabayando activamente, pa lluchar contra’l coronavirus” de delles maneres con donaciones o cesiones d’equipu, y recordó que les mázcares caseres “nun protexen énte’l contaxu”.

Na semeya, paves nuna cai de Xixón mientres l'estáu d'alarma.