El Conceyu toma midíes énte'l coronavirus

Suspende'l Plenu de marzu y tolos actos públicos, amás de zarrar el Teatru Xovellanos.

El Conceyu de Xixón, "en sintonía coles recomendaciones de la Organización Mundial de la Salú, del Ministeriu de Sanidá y de la Conseyería de Salú", decidió tomar midíes de prevención de la tresmisión del coronavirus COVID-19 per 14 díes dende mañana. La primera executóse ayeri mesmu: l'anulación del Plenu de marzu.

Once son en total les aiciones que pon en marcha l'equipu de gobiernu municipal, ente los que destaca la suspensión de tolos actos públicos, el pieslle de los centros de mayores y de les sales de llectura de bilblioteques y centros municipales. Suspéndese tamién tola actividá del Teatru Xovellanos, los cursos de la Universidá Popular y los xuegos deportivos escolares.

Anguaño n'Asturies hai confirmaos un total de 36 casos positivos. Ún de los afeutaos recibió ayeri l'alta, la primera curación del COVID-19 nel país.