El Plenu d'abril aprobará'l Plan de Normalización Llingüística

El Conseyu Asesor de la Llingua dio'l preste, finalmente col votu favoratible del PP y la oposición única de VOX, al documentu final del Plan de Normalización Llingüística 2020-2023 presentáu pola comisión que s'encargó de trabayar sobre'l borrador presentáu pol Conceyu. El pasu siguiente ye la so aprobación en Plenu, previsiblemente n'abril.

Dicha comisión vieno trabayando nel borrador presentáu en xineru, continuista col Plan de Normalización Llingüística 2016-2019. La mesma tuvo formada pol Partido Popular (PP), Izquierda Xunida (IX), CC OO Enseñanza, Iniciativa pol Asturianu y la Xunta pola Defensa de la Llingua Asturiana (XDLA), executando unes poques modificaciones al testu orixinal consistentes en cambios na redaición de la xustificación y de dalgunos de los puntos del Plan.

El documentu definitivu, que nun inclúi “la creación d’ un programa pilotu del asturianu como llingua vehicular nel ciclu de 0-3” como pretendía estudiar el Plan anterior, al considerar les dificultaes llegales que supondría entamalu, llevóse ayeri a la xunta del Conseyu Asesor, que lu aprobó con 12 votos a favor, una astención y un votu en contra. La postura de VOX yera esperable, anque sorprende la de Ciudadanos, que votara a favor del anterior Plan, prácticamente idénticu al actual.

Ente les organizaciones que votaron l’aprobación del testu taba’l PP, formación que sorprendiera la selmana pasada con un corréu electrónicu al respeuto de testu dexando entrever que se descolgaba del mesmu. El so representante nel Conseyu Asesor, Francisco Manuel Alonso Sánchez, participara activamente na comisión de trabayu sobre’l borrador del Plan, aportando matices a la redaición final que concasaben cola sensibilidá del PP.

Esta redaición va llevase al Plenu del mes próximu pa la so aprobación, dao que nun daba tiempu a incluyilu nel de marzu, que se celebra mañana. De nun haber cambios marcaos poles direiciones de los partíos con postures ambigües con respeuto al idioma, el consensu esistente nel Conseyu Asesor de la Llingua con respeuto al Plan de Normalización Llingüística va repetise na Casa Conceyu.

Na redacción del plan anterior algamóse la unanimidá nel Conseyu Asesor, anque daquella la estrema derecha inda nun tenía representación y nel Plenu toles fuercies votaron a favor sacante'l PP que s'astuvo al nun compartir el puntu de les escueles de 0-3 propuestu por Reciella, que finalmente figuró nel plan anque nun se punxo en marcha.