El PP dexa entrever que se descuelga del Plan de Normalización

El Conseyu Asesor de la Llingua nomó una Comisión que ta trabayando anguaño sobre'l borrador del mesmu pal periodu 2020-2023.

El Partido Popular sorprendió ayeri a los partíos y coleutivos que formen parte del mesmu con un crípticu corréu electrónicu sobre la so aportación al Plan de Normalización Llingüística. Nel mesmu paez dexar entrever que se descuelguen del mesmu, anque sorprendentemente esti escritu entama con un párrafu nel que s'espresa que ta bien facer un Plan de Normalización pa cumplir colo qu'afita la Constitución, l'Estatutu d'Autonomía y la Llei d'Usu y Promoción del Bable/Asturianu.

Sicasí, nel párrafu siguiente "concreten" qu'eses midíes nun pueden tar regulaes alministrativamente (sic). El testu paez tar escritu por dos persones distintes, yá que na primer parte dizse qu'hai que tomar midíes pa protexer l'asturianu y que "el Plan de Normalización Llingüística de Xixón aborda eses midíes necesaries".

Pero nun xiru de guión que contradiz l'afirmación anterior, el diz que "entiende qu'eses midíes necesaries a tomar pol Plan de Normalización pa consiguir el fomentu, estímulu y proteición de la llingua asturiana nun lleven a conformar o convertise nun instrumentu xurídicu alministrativu de calter normativu, con efeutos venceyantes pa l'alministración municipal en tolos sos estremos. Si la intención del Plan ye proyeutalu hacia la totalidá de l'actividá municipal y amás en rellación cola xeneralidá de los ciudadanos que se rellacionen cola mesma debería facese de forma que nun necesitase una disposición reglamentaria que nun creemos que se pueda executar al traviés d'un plan de normalización".

Participación y astención

Esta postura del PP sorprende, yá que pal anterior Plan de Normalización Llingüística, correspondiente del periodu 2016-2019, la formación sí participó na so ellaboración, anque finalmente s'astuvo en Plenu na votación pa la so aprobación. La razón argumentada foi la esistencia d'un proyeutu pa llevar la llingua asturiana a les escueles de 0-3, dalgo que finalmente nun se cumplió y que nun apaez nel borrador del documentu actual.