El Telecable clasifica pa la final a cuatro de la Copa d’Europa, que pretende organizar en Xixón

La victoria del Telecable na cancha del francés US Coutras (7-9) clasificó de manera matemática al conxuntu xixonés pa la final a cuatro de la Copa d’Europa femenina de ḥoquei sobre patinos xunto col catalán Generali Palau a falta d’una xornada pa la final de la fase de grupos. La intención de la direutiva ye organizala na ciudá.

Les de Fernando Sierra llevaron el sábadu’l trunfu nun partíu difícil marcáu pola efectividá goliadora alta de dambos equipos, teniendo que remontar un 2-0 inicial pa les occitanes. Col 5-5 nel electrónicu, tres llegar al descansu con 4-5, el Telecable frayó’l partíu con cuatro tantos siguíos que sentenciaron el choque.

Gracies a esti resultáu l’equipu torna a una final a cuatro de la Copa d’Europa, de la que tuvo ausente l’añu pasáu tres cayer col Manlleu, a falta d'una xornada. La competición estrenó nesta edición una fase de grupos formada por 2 de cuatro equipos na que les xixoneses quedaron encuadraos col Generali Palau de Plegamans, tamién clasificáu, y el francés Merignac.

Con motivu del 25 aniversariu del club, la direutiva del Solimar va tratar d’organizar la fase final en Xixón per tercera ocasión. Pa ella tamién tan clasificaos el propiu Manlleu y el Benfica portugués, que dexó fuera al Voltregà.

Semeya propiedá del Club Patín Gijón Solimar.