González Sanz arrenuncia al cargu de direutora xeneral d’Igualdá y Diversidá pa dar pasu a una muyer racializada

La ex diputada Rita Bosaho va ocupar definitivamente’l cargu de direutora xeneral d’Igualdá de Tratu y Diversidá Étnico-racial tres l’arrenuncia d’Alba González Sanz, conceyala de Podemos-EQUO qu’abandona güei’l grupu municipal. Les crítiques de coleutivos antirracistes pol so nomamientu llévala a dar un pasu a un llau.

El llunes conocíase l’apuesta d’Irene Montero, ministra d’Igualdá, pa incorporar a González Sanz como responsable de la Direición Xeneral d’Igualdá de Tratu y Diversidá Étnico-racial y dos díes depués, ayeri, la ex edil anunciaba que nun ocuparía definitivamente esi cargu. “Si dalgo sabemos nel feminismu ye que la representación y lo simbólico importen. Reorganizamos l’equipu d’esti ministeriu pa qu’haya una presencia visible de muyeres pertenecientes a coleutivos racializaos”, afirmó na so cuenta na rede social Twitter.

González Sanz, sicasí, va quedar en Madrid nel equipu de Montero pa trabayar nos “mesmos oxetivos de redistribución de la riqueza polos que dixera que sí en primer lugar”, esplicando al respeuto que les funciones que diba exercer na direición xeneral teníen que ver “cola redistribución económica, la paridá y otros aspeutos nos que venía trabayando, motivu pol qu’acepté el puestu, col enfotu de trabayar pola igualdá”. El so llugar nel grupu municipal de Podemos-EQUO ocúpalu Juan Miguel Chaves.

Si algo sabemos en el feminismo es que la representación y lo simbólico importan. Hemos reorganizado el equipo de este Ministerio para que haya una presencia visible de mujeres pertenecientes a colectivos racializados. Eso significa que no asumiré la Dirección General (1/4)

— Alba González Sanz (@albagsanz) January 15, 2020